Zerodhaના કો-ફાઉન્ડર નિખિલ કામથની મોટી જાહેરાત, દાન કરશે પોતાની મોટાભાગની કમાણી....

નિખિલ કામથ વોરેન બફેટ અને બિલ ગેટ્સ દ્વારા સ્થાપિત 'ધ ગિવિંગ પ્લેજ' ('The Giving Pledge')માં જોડાયા છે. આ સાથે, તે અઝીમ પ્રેમજી, કિરણ મઝુમદાર-શો અને રોહિણી અને નંદન નીલેકણી બાદ જોડાનાર ચોથા અને સૌથી યુવા ભારતીય બન્યા છે.

ભારતમાં સૌથી ઝડપથી વિકસતી સ્ટોક બ્રોકિંગ કંપની Zerodha ના સહ-સ્થાપક Nikhil Kamath નિખિલ કામથે એક મોટી જાહેરાત કરી છે. હાલમાં જ દેશના સૌથી યુવા અબજોપતિ બન્યા બાદ હવે તે પોતાની મોટાભાગની સંપત્તિ ચેરિટીમાં દાન કરશે. પરોપકાર્ય કરવા માટે તેઓ સુપ્રસિદ્ધ રોકાણકાર વોરેન બફેટ અને અબજોપતિ બિલ ગેટ્સની 'ધ ગિવિંગ પ્લેજ' સાથે જોડાયા છે. જેમાં જોડાનાર તે ચોથા ભારતીય બન્યા છે.

►નિખિલ કામથે શું કહી મોટી વાત ?

અબજોપતિ નિખિલ કામથે જણાવ્યું કે, 'મારી નાની ઉંમર હોવા છતાં, હું વિશ્વ પર સકારાત્મક અસર કરવા માટે કટિબદ્ધ છું અને વધુ સમાન સમાજ બનાવવા માટે ધ ગીવિંગ પ્લેજના મિશનમાં વિશ્વાસ કરું છું. જે તેમના મૂલ્યો અને આકાંક્ષાઓ સાથે સુસંગત છે. તમને જણાવી દઈએ કે નિખિલ કામથ આ ચેરિટેબલ સંસ્થામાં જોડાનાર સૌથી યુવા ભારતીય પણ છે. 36 વર્ષીય નિખિલ કામથ છેલ્લા બે દાયકાથી શેરબજારમાં સક્રિય છે, તેણે નાની ઉંમરે આ ક્ષેત્રમાં કામ કરવાનું શરૂ કર્યું હતું અને ખૂબ જ ઝડપથી અમીરોની યાદીમાં સામેલ થઈ ગયા હતા.

►આ ભારતીયો પણ અભિયાનમાં સામેલ છે

તમને જણાવ્યું તે રીતે, નિખિલ કામથ ધ ગિવિંગ પ્લેજમાં જોડાનાર ચોથા ભારતીય બન્યા છે, જેની સ્થાપના વોરેન બફેટ અને બિલ ગેટ્સ દ્વારા 2010માં કરવામાં આવી હતી. અગાઉ અઝીમ પ્રેમજી, કિરણ મઝુમદાર-શો અને રોહિણી અને નંદન નિલેકણી તેમાં જોડાઈ ચૂક્યા છે. નોંધપાત્ર રીતે, 'ધ ગીવિંગ પ્લેજ' એ એક અભિયાન છે, જે વિશ્વના ધનિકોને તેમના જીવનકાળ દરમિયાન અથવા તેમની ઇચ્છામાં ઓછામાં ઓછી અડધી સંપત્તિ પરોપકાર માટે દાન કરવા માટે પ્રોત્સાહિત કરે છે.

►સ્કુલ ડ્રોપઆઉટથી અબજોપતિ સુધીની સફર

નિખિલ કામથની સ્કૂલ ડ્રોપઆઉટથી લઈને દેશના સૌથી યુવા અબજોપતિ બનવા સુધીની સફર પણ ઘણી રસપ્રદ છે. ઝેરોધાના સહ-સ્થાપક પોતાની મહેનતના આધારે સફળતાના શિખરે પહોંચવા માટે જાણીતા છે. તેમની કંપની હાલમાં દેશની સૌથી ઝડપથી વિકસતી સ્ટોક બ્રોકિંગ કંપની છે. હ્યુમન્સ ઓફ બોમ્બેને આપેલા એક ઈન્ટરવ્યુ દરમિયાન પોતાની સફરનું વર્ણન કરતાં તેણે કહ્યું કે માત્ર 17 વર્ષની ઉંમરે તેણે કામ કરવાનું શરૂ કર્યું અને તેની પહેલી જોબ કોલ સેન્ટરમાં હતી, જ્યાં તેને માત્ર 8,000 રૂપિયાનો પગાર મળતો હતો.

►શેરબજારમાં એન્ટ્રી અને નસીબ બદલાયું

નિખિલ કામથ (Nikhil Kamath) ને નોકરી (job) માં રસ ન હતો તેથી તેણે શેરબજાર (share market) માં એન્ટ્રી કરીને વેપાર શરૂ કર્યો. અહીંથી જ તેમના અમીર બનવાની શરૂઆત થઈ હતી. નિખિલ કામથના કહેવા પ્રમાણે, જ્યારે તેમણે શેર ટ્રેડિંગ શરૂ કર્યું ત્યારે તેણે તેને ગંભીરતાથી લીધું ન હતું. જો કે, એક વર્ષની અંદર, તેને બજારની કિંમત ખબર પડી અને તેણે તેના પર સંપૂર્ણ ધ્યાન કેન્દ્રિત કર્યું. આ પછી તેણે પાછું વળીને જોયું નથી, તેની સંપત્તિ એટલી ઝડપે વધી કે આજે તે દેશના સૌથી યુવા અબજોપતિ તરીકે ઉભરી આવ્યા છે. ફોર્બ્સ અનુસાર, નિખિલ કામથની કુલ સંપત્તિ 110 મિલિયન ડોલર છે. એટલે કે અંદાજીત 10 હજાર કરોડ રૂપિયાના માલિક છે. અને હવે આ સંસ્થામાં જોડાયા બાદ તેઓ પોતાની જિંદગીની 50 ટકા કમાણી દાન કરી દેશે..